Naghatag sang suporta ang tanan nga mga senator-judges halin sa majority bloc agud ibalik sa hapon ang impeachment hearings batok kay Vice President Sara Duterte.
Suno kay Senator Panfilo Lacson, nadiskusyunan na sang maayo sang ila grupo ang nasambit nga desisyon agud indi man mangin limitado ang oras sang trial bangud ginasundan ini sang senate plenary session.
Ginpakigbahin niya nga mas mayo ini nga patigayunon halin alas-10 tubtob alas-2 sa hapon, samtang pagasuguran naman sa alas-2:30 sa hapon tubtob alas-7:30 sa gab-i ang sesyon sang senado nga mahimo pa nga maglab-ot sa 10 sa gab-i.
Pahayag man sang senador, pormal pa nila nga konsultahun ang mga senador halin sa minorya may kaangtanan sa nasambit nga proposal.
Nahibaluan nga ginpakigbahin ni Defense counsel spokesperson Michael Poa nga handa man ang kampo sang depensa nga magsunod kun may ara sang mangin pagbag-o sa schedule sang trial.
Madumduman nga una na nga ginpanugyan ni Senator-Judge Juan Miguel “Migz” Zubiri ang nasambit nga proposal agud mas mahatagan man ang prosecution kag defense team sang mas malawig nga oras nga magpreparar sa ila nga argumento.
