Nagapangabay ang Philippine Psychiatric Association ukon PPA kag Philippine Society for Child and Adolescent Psychiatry ukon PSCAP nga indi pagdayunon sang Department of Education ukon DEPED ang nakatalana nga nationwide live-shooter ukon active-attack drills sa Agosto 25.
Suno sa duwa ka grupo, may posibilidad nga makatuga ini sang trauma sa mga estudyante bangud hyper-realistic nga simulation ini sang violence.
Ginpunto sini nga importante ang paghanda sa mga sa eskwelahan, apang dapat trauma-informed kag nakabase sa scientific evidence.
Sa baylo nga aktuwal nga live-shooter simulation, ginasuhestyon nila ang tabletop exercises kun sa diin makighinun-anon ang mga manunudlo, staff kag mga ginikanan sa possible nga sitwasyon kag husto nga himuon sang mga estudyante.
Ginapangabay man sang psychiatrist nga ikonsiderar ang mga kinahanglanon sang mga estudyante nga may ara sang disabilities, sensory-processing needs, kag may ara sang daan nga traumatic experiences.
Samtang, suportado naman sang Philippine National Police and DepEd drill kag nagpangako nga magapreparar sila sang ila mga personnel kag resources para sa nationwide exercise.
