Ginmultahan sang P1-million ang isa ka gambling firm nga nag-sponsor sa pagpanagtag sang social media influencer nga si Ivana Alawi sang 100 ka luxury phones sang Hulyo.
Suno sa Philippine Amusement and Gaming Corporation (Pagcor), wala nagkuha sang permiso ang kumpaniya para sa amo nga promotional activity.
Ini ang ginpahayag ni Pagcor Chairman kag CEO Alejandro Tengco sa budget hearing sang House Committee on Appropriations para sa 2027.
Sa amo nga hearing, nagpabutyag sang katingala kag kabalaka si Kamanggagawa party-list Representative Elijah Fernando sa pagpakig-angot sang mga influencer kag gambling firms sa isa kag isa agud nga maka-promote sila online.
Sa kaso ni Alawi, may brand ambassadorship siya sa Casino Plus nga una naman ginsapubliko sang amo nga online gaming platform.
Suno sa Pagcor, kun masulit pa ang amo nga paglapas, posible ang mas mabug-at nga multa kag suspension, kag sa ulihi ang pagkansela sang lisensya sang kompanya.
Suno kay Tengco, kinahanglan anay sang pag-apruba sang Ad Standards Council kag Pagcor ang amo nga mga endorsement.
Ginpaathag man sini nga 50 porsyento sang online gaming operators subong ang ilegal kag wala nasakop sang hurisdiksyon sang Pagcor.
Sa pagpatuman batok sa ilegal nga gambling operators, nagakoordinar ang Pagcor sa Department of Information and Communications Technology, National Telecommunications Commission kag Cybercrime Investigation and Coordinating Center para sa pagpasaka sang kaso batok sa mga endorser sang ilegal nga gambling sites kag sa pagpauntat sang operasyon sang mga ini.#
