Na-stroke ang anay Special Disbursing Officer (SDO) sang Department of Education (DepEd) nga si Edward Fajarda nga amo kuntani ang papungkuon bilang masunod nga hostile witness sa impeachment court.
Sandig sa sulat sang iya abogado, nagapangayo si Fajarda sang permiso nga ma-excuse anay sa pag-atubang bilang witness sa Agosto 24, 25 kag 26.
Ginbasa ni Presiding Officer Francis Escudero sa katapusan nga bahin sang impeachment trial kahapon, Agusto 24, ang medical certificate nga nagasiling nga na-confine sa intensive care unit si Fajarda matapos ma-stroke sa lower back side sang iya utok.
Sa subong, nasaylo na si Fajarda sa regular room.
Apang bisan pa may medical certificate, ginmanduan ni Escudero ang chief sang Senate Medical Bureau nga ipaidalom sa examination si Fajarda kag i-validate sa iya doctor ang medical findings.
Ginmanduan man ang Senate medical office nga magsumiter sang report kaangot sa kondisyon ni Fajarda kag kumpirmahon kun indi gid siya makaatubang bilang testigo sini nga semana.
Ginpangayo naman ni Lead House Prosecutor Gerville Luistro ang certified true copy sang medical certificate ni Fajarda.
Nag-reserve man si Luistro sang Setyembre 7 para sa pagpresentar kay Fajarda bilang witness, bangud suno sa iya, tapos na sa amo nga petsa ang duha ka semana nga gin-rekomendar nga pagpahuway sang anay DepEd officer.
