Padayun pa nga ginahulat ang pinal nga desisyon kun madayun subong nga 2026 ang Barangay kag Sangguniang Kabataan Elections.
Ini ang ginpakigbahin ni Executive Secretary Ralph Recto matapos ini nga nagpadulong sa probinsya sang Iloilo may kaangtanan sa ginlunsyar nga Bagong Pilipinas Rice Distribution Program kag Bawat Bayan Makikinabang Program ni President Ferdinand Marcos Jr.
Sa interview sang Bombo Radyo kay Recto, iya ginpahayag nga sa iya pagpakig-isturya sa mga senador kag kongresista, madamo sa mga ini ang luyag nga palawigon ang termino sang mga Barangay officials.
Suno sa iya, padayun pa ini nga ginatalakay sang mga mamalidha agud madesisyonan sang maayo.
Nahibaluan nga aprubado na sa Senate Committee on Local Government ang pag-postpone sang nasambit nga eleksyon kun sa diin ginatuyo man nga ubrahun na nga lima ka tuig ang termino sang barangay kag SK officials.
Sa subong, padayun ang panawagan sang Commission on Elections sa mga mamalidha para sa klaro nga desisyon tubtob ikaduha nga semana sang Setyembre.
