Ginkumpirma sang ikaduha nga hostile witness sang prosecution panel nga gin-gasto sang Office of the Vice President (OVP) ang P125-million nga confidential funds sa sulod lamang sang 11 ka adlaw sang Disyembre 2022.
Suno kay OVP Assistant Chief of Staff Lemuel Ortonio, para ini sa “obligations already incurred” halin pa sang Oktubre.
Sa ika-18 nga adlaw sang impeachment trial, ginkumpirma sini nga lakip ini sa iya gin-sulat sa letter sang OVP bilang sabat sa mga pamangkot sang Commission on Audit (COA) parte sa paggamit sang amo nga pondo.
Suno sa sulat, ang P125-million gin-gamit para sa mga galastuhon nga gin-plano, gin-implementar, kag ginbayaran sa sulod sang three-month period ukon October-December 2022.
Ginpahayag ni Ortonio nga ang sulat nakabase sa impormasyon nga ginhatag ni Colonel Raymund Dante Lachica.
Si Lachica ang anay nagdumala sang security unit ni Duterte kag ginapahayag nga nangin responsable sa pagpatuman sang confidential activities sang OVP.
Ginkwestyon man siya ni Private Prosecutor Atty. Mae Divinagracia kun may yara bala sang security threats “of cataclysmic proportion” nga kinahanglan tapnaon kun ngaa nagamit ang P125-million confidential funds sang Dec. 21-31 sang 2022.
“I personally don’t know, of any information,” sabat ni Ortonio. “I cannot personally answer, maybe that is a question that may be answered by the security group.”
Ginpamangkot man ni Senate impeachment court presiding officer Francis “Chiz” Escudero kun ang “obligations already incurred” nagakahulugan bala sang utang.
Sabat ni Ortonio, indi ini utang, kundi mga arrangements nga gin-coordinate antes pa gin-release ang pondo, kag ginbayaran lamang ini sang mangin available na ang kwarta.
“Sir, based on what was shared to me, hindi siya utang, but arrangements have been done on mga activities that will be done and then the payment will be done once the money would be available already,” sabat sini.
Ginpamangkot pa gid siya liwat ni Escudero kun ano ang iya buot silingon. Paathag niya: “What I meant on this statement is that there are already arrangements that have been coordinated prior to the release of the funds.”
Ginpanindugan naman sang prosecution nga sa idalom sang Joint Circular 2015-01, dapat mauna ang cash advance antes maggasto, kag ginadumilian ang paggamit sang cash advance para bayaran ang mga obligasyon nga nahimo antes pa gin-release ang pondo.
