Nakahibalo, nag-authorize, kag nag-supervise si Vice President Sara Duterte sa pagdumala sang confidential funds sang Office of the Vice President (OVP) halin sa pagpangayo sang pondo tubtob sa liquidation.
Suno ini sa iya long-time aide nga si OVP Assistant Secretary kag Assistant Chief of Staff Lemuel Ortonio.
Partikular nga ginpamangkot si Ortonio kaangot sa P500-million nga confidential funds nga gin-release sa opisina.
Suno kay Ortonio, sandig sa iya nahibaluan, nahibaluan ni Duterte ang confidential activities kag kon paano ini ginapatuman.
“Based on my understanding, sir, and based on what I know, sir, yes, the Vice President knows about the confidential activities and how it is being implemented,” sabat ni Ortonio kay Senate Impeachment Court Presiding Officer Francis “Chiz” Escudero.
Ginkwestyon man siya kun may nahimo siya nga may kaangtanan sa pondo — lakip ang pagsabat sa audit findings — nga wala nahibaluan ukon wala gintugutan ni Duterte.
“None, Your Honor,” sabat sini.
“Lahat alam niya, in-authorize niya?”, follow up ni Escudero.
“Yes, Your Honor,” pahayag sang witness.
Ini nga sabtanay amo ang nagtapos sa direct examination ni House private prosecutor Atty. Mae Divinagracia nga nag-athag sang papel ni Duterte sa pondo sang OVP.
Nauna naman nga ginpamatud-an ni Ortonio nga wala sang alokasyon sang confidential funds sang nagpungko si Duterte sa opisina sang Hulyo 2022. Makit-an ini sa record sang iya predecessor nga si former Vice President Leni Robredo.
Sa record, nagpirma si Duterte sa sulat sang Agusto 22, 2022 nga naghingyo sang P250 million nga confidential funds halin sa Department of Budget and Management (DBM).#
