Nagaduda si Department of National Defense Secretary Gilberto Teodoro Jr. nga may mga pulitiko sa Pilipinas nga suportado sang China.
Suno kay Teodoro, posible nga katuyuan sini nga suporta sang China amo nga pabaskugon ang operasyon nila sa ginaagawan nga teritoryo sa West Philippine Sea.
Ginhimo ini nga pahayag ni Teodoro sa deliberasyon sang proposed fund sang Department of National Defense (DND) sa House Committee on Appropriations kun sa diin P324.632 bilyon ang ginapangayo sang ahensya.
Namangkot si Akbayan Partylist Rep. Dadah Ismula kun may masaligan nga impormasyon nga makapamatuod nga nga nagabaton sang suporta halin sa China ang pila ka elected officials.
Suno kay Teodoro, may yara sila sang basehan agud magsuspetsa apang wala sila sang access sa bank records sang mga pulitikon nga klaro nga nagaapin sa China.
Una na ginhangkat ni Teodoro ang mga pulitiko nga pro-China nga mag-resign sa pwesto kon indi nila masarangan panindugan kag pangapinan ang soberanya sang Pilipinas.
