Kumpyansa ang prosecution panel nga indi na mapanginwala ni Vice President Sara Duterte ang iya salabton sa ginaalegar nga misuse sa iya nga confidential funds.
Sa interview sang Bombo Radyo kay prosecution spokesperson kag Kabataan Representative Renee Co, iya ginpahayag nga base ini sa pirma mismo sang bise presidente, ang pag-approve sini, kag ang pagpangayo sang pondo.
Ginbasehan sini ang testimoniya sang duha ka hostile witnesses nga sanday Office of the Vice President (OVP) Assistant Secretary and Assistant Chief of Staff Lemuel Ortonio kag OVP special disbursing officer Gina Acosta.
Nag-ako si Acosta nga si Duterte ang personal nga nagmandu sa iya nga i-release ang kwarta kag i-turn over ang P125 million nga cash kay Col. Raymund Dante Lachica apisar nga indi ini ang accountable officer.
Si Ortonio naman ang nagkumpirma nga nakahibalo, nag-authorize, kag nag-supervise si Duterte sa pag-uyat sang confidential funds — halin mismo sa request tubtub sa liquidation.
Suno pa kay Co, indi pwede nga “kwarta anay antes ang plano” kun mag-request sang budget, bangud wala sang kasiguraduhan kun maggamit sa husto ang amo nga pondo.
Ini ang kaangot naman sa pahayag ni Ortonio nga nag-request ang OVP sang confidential funds sa Department of Budget and Management (DBM) sang 2022 antes pa man ini nagpreparar sang Physical and Financial Plan.
Nahibaluan nga natalana nga ipresentar sang prosekusyon si Atty. Michael Wesley Poa bilang hostile witness sa masunod nga semana samtang ginapadayon sini ang kaso nga may kaangtanan sa alegasyon sang sayop ukon indi husto nga paggamit sang P112.5 million nga confidential funds sang Department of Education (DepEd).
Nagaserbe subong si Poa nga defense counsel. Kun pagatugutan ang amo nga status, siya ang ikatatlo nga ideklarar nga hostile witness sang Senate impeachment court.#
