Ginalauman sang prosecution nga masakop pati si Vice President Sara Duterte sang istrikto nga pagpatuman sang sub judice rule nga ginpaguwa ni Presiding Judge Francis “Chiz” Escudero.
Kaangot ini sa statement ni Duterte sang Agusto 6 nga indi na siya kinahanglan mag-disrupt sa impeachment proceedings bangud magamo na nga daan suno sa iya ang trial kag may nagakatabo nga “bending the law.”
Sa interview sang Bombo Radyo kay Prosecution spokesperson kag Kabataan Rep. Renee Co, iya ginpahayag nga paagi sa sini nga ruling, mapakita ang respeto sa awtoridad sang Senate bilang impeachment court.
Suno kay Representative Co, dapat nga indi mapakanubo ang ikasarang sang proseso nga maangkon ang accountability. Dapat man suno sa iya nga kun matapos ang trial, may yara gid sang may manabat.
Sang Myerkules, ginpahanumdom man ni Escudero kay Duterte nga dapat magsunod sa mga restriksyon sa iya paghambal sa publiko kaangot sa impeachment case.
Ini matapos magpagwa si Duterte sang statement sa social media samtang ginabasa man sa korte ang mas istrikto nga pagpatuman sang Rule 18.
Sang amo man nga adlaw, ginhangkat ni Duterte ang mga prosecutor nga pamatud-an ang mga kaso paagi sa ebidensya kag indi paagi sa insulto, espekulasyon ukon pamulitika.
Ginpalab-ot sang House lead prosecutor nga si Gerville Luistro sa korte ang statement ni Duterte. Suno kay Escudero sang amo nga tion, indi pagdagdagan sang sanction si Duterte bangud ginpagwa niya ang statement samtang ginapahayag pa mismo sang presiding judge ang iya ruling.#
