Nagpanawagan ang prosecution panel sa mga Ilonggo nga padayon nga magbantay sa nagakatabo sa impeachment proceedings agud masiguro nga may manabat kun sa diin nagkadto ang kwarta nga iya gid kuntani sang pumuluyo.
Kabahin ini sang mensahe ni prosecution spokesperson kag Kabataan Representative Renee Co sa pagtapos sang ikawalo nga semana sang proceedings sa impeachment court.
Sa interview sang Bombo Radyo kay Co, iya ginpahayag nga pareho sa iban nga isyu nga ginaatubang sang pungsod subong, ang punto sa impeachment amo nga masigurado nga magkadto gid ang pondo sa serbisyo nga dapat ang mga Pilipino man ang makapulos.
Ginpahanumdom sini ang testimoniya sang isa sa mga hostile witness nga nakahibalo, nag-authorize, kag nag-supervise si Vice President Sara Duterte sa handling sang confidential funds halin mismo sa request tubtub sa liquidation. Ang nagkumpirma sini amo si Office of the Vice President (OVP) Assistant Secretary and Assistant Chief of Staff Lemuel Ortonio.
Dapat suno kay Co nga mabalik ang kwarta kag magkadto ini sa serbisyo nga mabenepisyuhan gid sang publiko.
“Hindi natin dapat hayaan na may pananagutan na hindi makamit kasi hindi tayo nakatunghay,” pahayag pa sang prosecution spokesperson.
Yara pa gihapon subong naka-sentro sa isyu sang confidential funds ang impeachment batok kay Duterte.
Natalana nga ipresentar sang prosekusyon si Atty. Michael Wesley Poa bilang hostile witness sa masunod nga semana samtang ginapadayon sini ang kaso nga may kaangtanan sa alegasyon sang sayop ukon indi husto nga paggamit sang P112.5 million nga confidential funds sang Department of Education (DepEd).
Nagaserbe subong si Poa nga defense counsel. Kun pagatugutan ang amo nga status, siya ang ikatatlo nga ideklarar nga hostile witness sang Senate impeachment court.#
