Indi na magbalos pa si Senator Robin Padilla sa kritisismo ni Lanao del Sur Representative Zia Alonto Adiong kaangot sa isyu sang mga alias nga naistoryahan subong nga semana sa impeachment trial ni Vice President Sara Duterte.
Kasunod ini sang interjection sang Myerkules kun sa diin ginkwestyon ni Padilla si Private Prosecutor Atty. Mae Divinagracia kun nakahibalo ini nga naggamit man anay ang national heroes sang mga alias.
Gin-gamit niya ini nga pagpaanggid sa konteksto sang mga alias nga nakit-an sa acknowledgment receipts sang confidential funds ni Duterte.
Sa press conference pagkatapos sang trial, ginsiling naman ni Adiong nga insulto sa national heroes ang ginhimo ni Padilla nga pagpaanggid sang ila alias sa mga alias nga nakabutang sa records sang Office of the Vice President.
Pahayag pa sini, basi kun magligid sa ila lulubngan ang mga baganihan bangud sa amo nga linyada ni Padilla.
“With due respect to my brother in faith and sitting senator, I think those national heroes whose aliases were referenced would be probably rolling, rolling in their graves,” suno kay Adiong.
“To put them on the equal footing as Mico Harina, as Andy Lim, as Ms. Ngitngit, is already, again, an insult to the sacrifices they have made for this country,” dugang sini.
Sa post naman ni Padilla, ginsiling sini nga utod niya sa Islam si Adiong, gani nga indi na siya magsugpon pa.
“Congressman Ziaur-Rahman ‘Zia’ Alonto Adiong… Kapatid kita sa Islam at personal na kaibigan ko ang inyong angkan. I choose to stay silent rather than fire back at your statement,” pahayag sini.
Sa separado nga pahayag sang senator-judge, nauna na sini ginsiling nga “paid troll farms” ang mga nagapakamalaot sa iya sa mga pamangkot sa impeachment court.
“Ako ay ibinoto ng mga totoong tao. I’m only answerable to them, not to the paid troll farms,” suno kay Padilla. “Dios mio, magugutom ang mga troll kapag tumigil ako.”#
