Padayon nga gina-monitor sang Philippine Atmospheric, Geophysical and Astronomical Services Administration ukon PAGASA ang duwa ka low-pressure areas nga may posibilidad nga magapabaskog sang southwest monsoon o habagat sa pila ka bahin sang pungsod.
Suno sa weather bureau, ang isa ka LPA nga yara sa guwa sang Philippine Area of Responsibility kag may medium chance nga mangin tropical depression sa sulod sang masunod nga 24 ka oras.
Ulihi ini nga nakit-an sa kalayuon nga 1,580 km nasidlangan sang Extreme Northern Luzon.
Ang isa naman ka LPA, sa sulod sang PAR, may manubo nga tyansa nga mangin tropical depression.
Na-monitor ini sa kalayuon nga 510 km North Northeast sang Itbayat, Batanes.
Samtang, padayon naman nga naga-eksperyensya sang mabaskog nga pag-ulan ang pila ka bahin sang Luzon bangud sang habagat.
Bangud sini, gin-suspinde sang Malacañang ang trabaho sa gobyerno kag klase sa tanan nga lebel sa Metro Manila kag 16 ka probinsya kahapon nga adlaw.
Ginpanugyan naman sang awtoridad sa publiko nga magpabilin nga alerto kag padayon nga bantayan ang mga pahibalo sang PAGASA, ilabi na gid sa mga lugar nga nagaeksperyensya sang mabaskog nga pag-ulan.
