Naglab-ot na sa masobra 570 ka indibidwal ang na-report nga nagkalamatay samtang masobra 1,900 naman ang padayon pa nga ginapangita sang mga awtoridad matapos ang flashflood nga nagluntad sa Nepal-Tibet border.
Temporaryo nga ginsuspende kahapon nga adlaw ang rescue operations matapos liwat nga mag-awas ang isa ka lake.
Naghatag ini sang kakugmat sa mga awtoridad nga basi mag-abot ang isa pa gid ka mabaskog nga pagragasa sang tubig.
Apang sang ulihi, ginpahayag sang mga awtoridad nga nag-untat ini, gani ginpadayon liwat ang search and rescue operations.
Na-record man sang awtoridad ang masobra 90,000 ka indibidwal nga naapektuhan sang kalamidad.
Suno sa mga report, kalabanan sa missing ang mga foreign nationals, lakip na ang mga Hindu pilgrims kag trekkers nga nagakadto sa Mount Kailash kag Lake Mansarovar.
Samtang, naghatag na sang bulig ang pila ka mga pungsod para sa search and rescue operations.
Apang ginpahayag sang gobyerno sang Nepal nga sa subong, wala pa sila nagakinahanglan sang foreign rescue teams.
Una na nga ginkumpirma sang pamilya nga lakip sa ginatos nga missing amo ang Filipino nga si Juan Carlos Manalo, 30-anyos nga doctor.
Suno sa iya utod nga si Chiara, ulihi nga naka-kontak sa ila si Juan Carlos sang Agusto 25, pasado ala-una sang hapon, Philippine time, ukon antes natabo ang flash floods.
Ulihi nga nakit-an sanday Juan Carlos kag ang iya nga grupo sa immigration office sa Gyirong sa Tibetan side sang border.
