Ginmanduan sang Department of Agriculture ukon DA ang ahensya nga yara sa iya idalum nga bag-uhon kag pauswagon ang ila mga plano sa pag-atubang sa epekto sang El Niño.
Ini agud malikawan ang daku nga epekto sang malawig nga tag-ilinit sa suplay sang pagkaon kag presyo.
Suno kay Agriculture Secretary Francisco Tiu Laurel Jr., dapat gamiton ang mga natun-an halin sa nagligad nga El Niño agud mangin mas preparado ang gobyerno.
Lakip sa mga preparasyon ang pagpalapad sang irrigation, pag-adjust sang schedule sa pagtanom, paghatag sang drought-resistant nga mga binhi kag pag-monitor sang suplay sang pagkaon.
Plano man sang DA nga buligan ang mga mangunguma sa mga lugar nga mas gamay ang epekto sang El Niño, pati na ang paggamit sang cloud seeding kag solar-powered irrigation agud madugangan ang tubig para sa mga uma.
Magahatag man ang ahensya sang crop insurance kag pinansyal nga bulig sa mga mangunguma nga apektado sang tag-ilinit.
Ginpaandaman sang DA nga posible nga mag-nubo ang produksyon sang palay sa ikatatlo nga quarter sang 2026 bangud sa El Niño.
