Nagpaathag ang isa ka Infectious Diseases Specialist sa publiko nga mahimo gihapon makaagum sang leptospirosis ang isa ka tawo bisan wala sang pilas ukon samad sa lawas.
Sa interview sang Bombo Radyo kay Dr. Tomas T. Saiton, Jr., isa ka Infectious Diseases Specialist, iya ginpahayag nga mahimo makasulod ang bacteria sang leptospirosis nga amo ang Leptospira bacteria paagi sa mata, ilong, baba kag genital area.
Suno kay Dr. Saiton, ang leptospirosis ang masami naghalin sa ihi sang infected nga mga sapat, ilabi na sa ilaga.
Pahayag niya, kadam-an sang kaso sang leptospirosis mahimo nga mild ukon wala sang klaro nga sintomas.
Apang kun nagaka-eksperyensya sang hilanat pagkatapos nga nakalusong sa baha, pagsakit sang pusug-pusugan, kag pagsakit sang hawak, gilayon na nga magpakonsulta sa doktor.
Ginpahayag man sini, ang severe leptospirosis mahimo magresulta sa kidney failure nga posible magkinahanglan sang dialysis, ukon pulmonary hemorrhage nga nagapadugo sa baga kag pagdupla sang dugo.
Mahimo man maglapta ang bacteria sa atay, korason kag utok, kag iban pa nga komplikasyon nga mahimu tunaan sang kamatayon sang tawo.
Dugang pa sang doktor, posible gihapon makaagum sang leptospirosis ang isa ka tawo nga naagi na sini.
