Ginpahayag sang lola sang isa ka menor de edad nga lalaki nga nasapwan-patay sa higad sang dalan sa Barangay Balud Lilo-an, Zarraga, Iloilo, kaina sang aga, Agosto 31 nga gin-pitchikurno ini sa tangkugo sang nagligad nga semana.
Matandaan nga ginkilala ang biktima kay alyas Miko kag 15-anyos ang edad.
Sa interview sang Bombo Radyo kay Mercedes Ganancial, lola sang biktima, iya ginpahayag nga nanugid sa iya ang biktima nga gin-pitchikurno ini sang isa ka estudyante sa isa ka eskwelahan sa nasambit nga banwa.
Suno kay Ganancial, wala ini sila sang ihibalo kun sino nga estudyante ang naghimu sadto sa iya nga apo.
Pahayag niya, wala sang gamo nga klase sang bata sa ila nga pamilya ang biktima kag nagapati sa kun ano man ang i-sugo sa iya.
Ginpahayag man sini nga iya nanotisyaran sini nga kaangay masakit manulok ang iya nga apo kun sa diin iya ini ginasaway bangud nga posible ma-misinterpret ini sang iban.
Apang, gin-athag niya nga normal lamang ini nga panulok sang iya apo kag wala gid ini sang gamo.
Dugang pa niya, nagakadto sa ila nga balay sa Calumpang, Molo sa Miko kada Biyernes sang hapon para nga magbulig-bulig sa trabaho agud nga makakita sang iya nga kwarta.
May yara naman sang ginasuspetsahan ang ila pamilya sa kun sino ang posible naghimu sini sa iya nga apo.
Hustiya sa karun ang ginapanawagan sang pamilya sang biktima.
