Ginklaro sang Iloilo City Government nga indi lamang presyo ang gin-basehan sa pagpili sang electric mini sweeper truck kundi pati ang kalidad kag efficiency sini sunod sa kinahanglanon sang syudad.
Ini kasunod sang kontrobersiya nga pamangkutanon sang mga Ilonggo nahanungod nga naglab-ot sa ₱3.5 milyon nga electric mini sweeper truck nga mahimo man kuno ini mabakal sa mas barato nga presyo nga makita online.
Sa interview sang Bombo Radyo kay Engineer Neil Ravena, Head sang GSO, iya ginpahayag nga ginpahayag nga lain ang specifications sang ginbakal sang city government ikumpara sa mga electric sweeper nga makita lamang online.
Ginpunto niya nga ang ila nga mini sweeper, may yara sang hydraulic-powered articulated arm nga mahimo makalabot sa curbing ukon gutter sa kilid sang dalan rason nga mas epektibo ini para sa street sweeping sa Iloilo City.
Pahayag pa niya, isa man sa nagpataas sang presyo, amo ang battery, electrical requirements sang equipment, warranty, shipping fee kag importation costs sini.
Ginpaathag man sini, nalakip sa mahal nga presyo ang battery, bangud ang sweeper makagamit sang 220 volts kag 60 hertz nga suplay sang kuryente, rason nga indi na kinahanglan sang mas mahal nga transformer kag charging setup.
Ginpahayag man ni Engr. Ravena, nag-agi sa insakto nga proseso kag bidding ang pagbakal sang bag-o nga nasambit nga equipment kag ang pondo sini ang naghalin sa “financial benefits” sa idalom sang Energy Power Industry Reform Act (EPIRA).
Dugang pa niya, bukas ang city government sa paghatag sang mga dokumento nahanungod sa procurement, bilang bahin sang transparency kag public accountability.
