Ginpaidalom na sa state of calamity ang 117 ka lugar sa Pilipinas subong nga Agosto 31.
Ini ang mismo nga ginkumpirmar ni Office of Civil Defense Disaster Preparedness Service director Vicente Gregorio Tomas.
May kaangtanan ini sa nagapadayun nga epekto sang habagat kag ginbilin sini nga baha kag halit sa palangabuhian, balay, kag propedad sang publiko ilabi na sa bahin sang Luzon.
Kabahin sa mga nagdeklarar amo ang Probinsya sang Tarlac kun sa diin duha ka mayor nga taytay ang naguba nga amo ang Aquino bridge kag Agana bridge.
Nagpahanumdom naman ang Mines and Geosciences Bureau Geohazards Operations Center nga importante nga mangin alerto ilabi na nga yara sa masobra 3,700 ka mga barangay sa pungsod ang posible nga maapektuhan sang landslide kag pagbaha bangud sa gihapon sa habagat kag Bagyo Pilandok.
Sa subong, padayun nga ginamonitor sang Philippine Atmospheric, Geophysical and Astronomical Services Administration ang duha ka Tropical depression kag isa ka Low Pressure area sa sagwa sang PAR kag amo man ang mangin epekto sang Bagyo Pilandok nga yara subong sa East of Extreme Northern Luzon.
