Arestado ang isa ka negosyante matapos ginaalegar nga nagpamahog nga patyon ang isa ka lalaki sa Barangay San Roque, Buenavista, Guimaras, gab-i sang Agosto 30.
Ginkilala ang suspek nga si Edison Delos Reyes, 63-anyos, residente sang Barangay Sto. Rosario, Buenavista, Guimaras.
Samtang, ang biktima naman amo si Marjol Mission, 24-anyos, isa ka vulcanizer sang Barangay Salvacion, Buenavista, Guimaras.
Suno kay Pmaj. Ma. Jona Casono, acting chief of police sang Buenavista Municipal Police Station, iya ginpahayag nga nagdangop sa ila ang isa sa mga biktima pasado las 8:05 sang gab-i bangud gin-kidnap sang suspek ang live in partner sini nga si Luna Caballero, naga-edad sang 21-anyos.
Gilayon nga nagresponde ang mga otoridad sa lugar kun diin gindala si Caballero kag gin-rescue ini.
Matapos ang serye sang pagpakig-istorya sang mga kapulisan sa suspek boluntaryo ini nga nagsurrender kag gindala sa police station.
Ginpahayag nga nag-ugat ang insidente sa daan nga hiligut-anon sang duha ka kampo may kaangtanan sa Qualified Theft case nga ginpasaka ni Delos Reyes batok kay Mission kag gin-dismiss sang korte.
Sa karon gina-preparar na ang igapasaka nga kaso nga grave threat kag illegal detention batok sa suspek
