Padayon ang kampanya sang Iloilo City Traffic and Transportation Management Office ukon ICTTMO kag Public Order and Safety Management Office ukon POSMO sa paghatag sang awtoridad sa mga opisyales sang barangay nahanungod sa traffic enforcement.
Sa interview sang Bombo Radyo kay Retired Colonel Uldarico Garbanzos, head sang ICTTMO kag POSMO, iya ginpahayag nga kabahin ini sang katungdanan sang barangay officials sa paghatag sang ihibalo sa ila pumuluyo sa pagmintinar sang katawhayan kag disiplina sa ila lugar.
Suno pa kay Garbanzos, importante ini agud malikawan ang illegal parking kag mga obstruction nga nagapugong sa paglabay sang mga emergency vehicle.
Pahayag pa ni Garbanzos, kabahin man ini sa ila kampanya sa pag-establisar sang Barangay Common Parking Areas paagi sa barangay ordinance.
Ini agud mas mangin organisado ang mga ginaparadahan sang three-wheeler, four-wheeler kag mga food cart.
Nahibaluan nga diri sa syudad masobra 50 na ka barangay ang nangin kabahin sa Barangay Traffic Deputation and Empowerment Program.
