Balantayan 10:15 subong nga aga ang pag-umpisa sang hampang ni Alex Eala sa prestihiyoso nga US Open.
Patigayunon ang match sa USTA Billie Jean King National Tennis Center sa Flushing Meadows, New York kun sa diin makaatubang sini ang 23-anyos nga si Mary Stoiana nga American tennis player halin sa Southbury, Connecticut.
Rank 18 ang 21-anyos nga Pinay sa latest WTA rankings kag siya ang 17th seed sa sini nga tournament.
Daku ini nga lumpat sa iya nauna nga kampanya sa US Open sang nagligad nga tuig kun sa diin nagapang-75 siya sa ranking.
Nalutos niya sang amo nga tuig ang 14th-seed nga si Clara Tauson sa opening round, apang nataktak siya sa masunod nga game sa kamot ni Cristina Bucsa.
Subong nga tuig, isa si Eala sa pinakapaborito ilabi na nga bag-o lang sini nakuha ang iya una nga WTA Tour title sa Mubadala DC Open.
Ini naman ang debut ni Stoiana sa main draw sang Grand Slam matapos nalampasan ang tatlo ka rounds sang qualifying kun sa diin ginlutos sini sanday Harmony Tan, Katie Swan, kag Yue Yuan antes nakalab-ot sa Flushing Meadows.#
