Ginkakas sang Sandiganbayan Fifth Division si anay Department of Public Works and Highways (DPWH) Secretary Manuel Bonoan bilang isa sa mga akusado sa kaso nga plunder kag graft nga ginpasaka sang Office of the Ombudsman.
Sa boto nga 2-1, ginpaboran sang korte ang motion sang Ombudsman nga kuhaon ukon kakason si Bonoan bilang akusado agud mahimo ini nga state witness.
Suno sa Sandiganbayan, yara sa prosecutorial discretion ukon poder sang prosecutors ang pagdesisyon kon sin-o ang gamiton bilang testigo sang state.
“The decision to move for the discharge of an accused is part of the Ombudsman’s prosecutorial discretion of who should be used as a state witness, to bolster the successful prosecution of criminal offenses,” suno sa Sandiganbayan.
Si Bonoan amo ang kaupod ni Senator Jinggoy Estrada kag tatlo pa ka persona nga gin-akusaran sang paghimbunanay agud makakuha sang masobra P500 million nga kickback halin sa mga proyekto para sa flood control.
Suno sa Ombudsman, importante ang kooperasyon ni Bonoan agud mabuksan kag mahayag ang sistema sa likod sang ginapatihan nga kickback scheme.
Ginpahayag man sang korte nga may poder ang Ombudsman sa paghatag sang immunity sa idalom sang Republic Act 6770.
Samtang, ginpahayag ni Estrada nga ginatahod niya ang desisyon sang korte. Suno sa iya, tun-an sang iya legal team ang iban pa nga legal remedies nga mahimo niya gamiton.
“While I respect the decision of the Sandiganbayan, I wish to emphasize that there remain legal remedies available to me under our judicial system, which my legal team will carefully study and pursue at the appropriate time,” suno sa detained senator.
“My faith in our judicial system remains firm,” dugang sini.
Nahibaluan nga naka-hospital arrest si Bonoan sa PNP General Hospital. Mahimo na siya mahatagan sang temporaryo nga kahilwayan bangud nga nakapyansa na ini sa nabilin nga kaso nga graft batok sa iya.#
