Ginpasiguro sang Malacañang kay Vice President Sara Duterte kag sa iya mga kaupod nga indi paggamiton sang Marcos administration ang Philippine National Police ukon PNP agud ibutang sa peligro ang ila kabuhi.
Suno kay Palace Press Officer Claire Castro, wala sang himuon nga malain ang administrasyon kag nagpahayag nga ginahimo lamang sang PNP ang ila katungdanan nga wala sing ginapaboran.
Samtang, ginpahayag naman ni PNP Chief General Jose Melencio Nartatez Jr. nga padayon nga pagatutukan sang mga police unit ang seguridad ni Duterte kag sang iya pamilya, lakip na ang pagpatigayon sang threat assessment.
Apang suno sa PNP, tubtob subong wala pa sila sang nakit-an nga verified threat batok sa bise presidente ukon sa pamilya sini.
Nahibaluan nga nag-ugat ang kahadlok ni Duterte nahanungod sa iya seguridad matapos ini mapasakaan sang tatlo ka kaso sang grave threats batok kanday President Ferdinand Marcos Jr., First Lady Liza Araneta-Marcos kag anay House Speaker Martin Romualdez.
Nagpahayag man si Duterte nga wala siya sang pagsalig sa pulisya antes siya mag-atubang sa korte, kag nag-post sang P360,000 nga piyansa.
