Bukas gid ang banwa sang New Lucena sa ginatuyo nga imbestigasyon ni Iloilo 2nd District Board Member June Mondejar may kaangtanan sa ginatudlo nga rason sang pagbaha sa mga banwa sa Segundo distrito.
Sa interview sang Bombo Radyo kay New Lucena Mayor Carl Vincent Mondejar, iya ginapahayag nga maayo gid ini nga lihok sang Board Member agud mahibaluan man sang mga kabanwahanan ang dapat kag nagakaigo nga solusyon sa mga flooding incidents.
Ginpakigbahin man sang alcalde nga may ara sila sang patigayunon nga pagsinapol ukon committee hearing kaupod si Mondejar kun sa diin pagalantawun man sang board member kun nagasunod man sa requirements ang mga ginatukod nga flood mitigation projects.
Nahibaluan nga sa banwa sang New Lucena, gindesignar ang mga TUPAD beneficiaries sa clearing operations sang mga flood control projects kag drainage system kun sa diin ginapabulig man sini ang mga empleyado sang ila munisipyo.
Suno sa iya, importante nga magpabilin nga tinlo ang nasambit nga mga floodways agud malikawan ang tuman nga pagbaha.
Madumduman nga isa ang New Lucena sa probinsya sang Iloilo sa mga tuman nga naapektuhan sang baha matapos ang mamunog nga ulan nga dala sang habagat sang nagligad nga Agosto.
