Personal nga ginbayran ni GSO Head Engineer Neil Ravena ang P10,000 nga multa nga ginpapanaog sang LTO Region VI sa dump truck sang Iloilo City Government nga padayon nga naga-operate apisar nga wala sang likod nga plaka kag depektibo ang signal lights.
Sa interview sang Bombo Radyo kay Ravena, iya ginpahayag nga updated ang rehistro kag may insurance ang salakyan, apang wala natalupangdan sang driver ang depekto sini.
Nahibaluan nga ginagamit ang truck sa pagpanghakot sang debris kag basura halin sa mga lugar nga nasunugan, kag nahamtang ini sa Calajunan Sanitary Landfill.
Suno pa kay Ravena, wala ginbaton sang LTO ang sabat sang City Government sa Show Cause Order, gani ginmultahan ini para sa duha ka violations.
Ginpahayag ni LTO Region VI Regional Director Atty. Gaudioso P. Geduspan II nga wala sang exemption ang government vehicles sa traffic laws, kag dapat man sila manabat sa mga paglapas pareho sang pribado nga salakyan.
Base sa polisa sang syudad, ang department head ang responsable sa pagbayad sang multa nga may kaangtanan sa salakyan sang iya opisina.
