Nadulaan sang duha ka mga pari ang Roman Catholic Diocese of Cubao sa sulod lamang sang isa ka adlaw.
Ginpahibalo sang Diocese ang kamatayon ni Fr. Michael James Ty, 54-anyos, alas tres sang hapon subong nga Byernes, Septyembre 11.
Pila lang ka minutos ang nagligad, nagpagwa man ang Diocese sang separado nga pahibalo nga napatay man si Fr. Edward Anthony Cometa, 35-anyos.
Ang duha ka pari nagtaliwan sa pareho nga ospital, apang wala pa ginpahayag sang Diocese ang rason sang ila kamatayon.
“A day of mourning for the Diocese of Cubao. In life and in death, God calls two by two,” suno kay Bishop Elias Ayuban Jr. sa iya nga social media post.
Ginlaragway sang Diocese ang duha ka pari bilang “brothers in ministry” kag ginpangabay ang mga kaparian kag mga tumuluo nga magpangamuyo para sa ila kag sa ila mga pamilya.
Ginpahayag man sang Diocese nga ipahibalo ang mga detalye kaangot sa haya, mga seremonya sang paglubong, kag pagpalubong sa tion nga matapos na ang mga preparasyon.#
