Natalana nga mapasakaan na sang kaso ang mga indibidwal nga may kaangtanan sa kamatayon sang 15-anyos nga solterito nga nasapwan sa kilid sang dalan sa Barangay Balud Lilo-an, Zarraga, Iloilo.
Sa interview sang Bombo Radyo kay Police Major Beverly Cataluña, hepe sang Zarraga Municipal Police Station, iya ginpahayag nga nagpatigayon sila sang backtracking tatlo ka adlaw antes natabo ang insidente sa pagkasapo sa biktima.
May ara naman sila sang witness nga makapamatuod kun sin-o ang mga indibidwal nga involve.
Base man sa natipon nga imbestigasyon, ginpatihan nga naigo sang matig-a nga bagay ukon ginsumbag ang biktima nga gintunaan sang pagsuprer sini sang traumatic head injury rason sang kamatayon sini.
Pahayag pa ni Cataluña nga ginakabig nila nga 90% na ang development sang ila nga imbestigasyon kag may ginahulat pa sila nga dugang nga ebidensya
Kaso nga homicide ang ipasaka sa mga indibidwal nga involved.
Matandaan nga nakit-an ang biktima nga residente sang Barangay Talauguis, Zarraga sang Agusto 31, sang pasado alas sais sa aga.
Sang adlaw nga nakit-an ini, may scratches ukon gasgas ini sa tuhod kag sa tudlo, apang wala na sang maathag nga external injuries nga makapaathag sang iya kamatayon.
Una na nga ginpahayag sang Lola sang menor de edad nga gin-pitchikurno ang iya apo sa tangkugo antes ini nasapwan nga wala na sang kabuhi.
