Ginklaro sang mga vendors sa sulod sang bag-o nga merkado sang Mandurriao Public Market nga wala sang mando nga indi pwede magbalik ang iban nga mga vendors nga ginpasaylo anay sang una sa daan nga merkado.
Sa interview sang Bombo Radyo kay Lino Liguan, isa ka vendor, iya ginpahayag nga ginsingganan na sila sang head sang Local Economic Enterprise Office nga si Maricel Mabaquaio nga magsaylo na sa bag-o nga mercado.
Ini bangud delikado na sa daan nga mercado, magluwas nga mahigko may posibilidad pa nga ma-leptospirosis ang mga ini kun may pagbaha nga magluntad sa lugar.
Suno pa kay Liguan nga ginapunggan lamang sang secretary sang Vendors Association sang Mandurriao nga si Rolyn Gallaza nga magbalik ang iban nga vendors rason nga nabudlayan ang mga ini nga makabenta sa daan nga mercado kag nakaapekto na ini sa ila nga pangabuhian.
Gin-athag man ni Liguan nga wala sang “back up” kag “tinawo” si Mayor Raisa Treñas nga amo ang nagapa-isog sa ila nga magtinir sa bag-o nga mercado bangud bukas man ini sa tanan.
Pahayag pa ni Liguan kabutigan man ang pahayag nga nagapangakig ang kontraktor nga si Plaridel Nava bangud personal man sila nakaistoryahanay nga pwede ang mga ini nga magbalik kag magbaligya sa sulod sang bag-o nga mercado.
Gindugang pa ni Liguan nga natalana man nga sa Lunes nga adlaw pabalikon na sila tanan sang Local Economic Enterprise Office sa bag-o nga mercado agud wala na sang gamo nga magluntad sa tunga nila sang mga kaupod man sini nga vendors.
Nahibaluan nga kahapon nga adlaw nagpa-Bombo ang Secretary sang vendors’ association sa Mandurriao, Iloilo City bangud sang ginapahayag nga indi patas nga pagtratar sa ila bilang mga manugbaligya.
Nakaapekto na ini sa ila nga pangabuhian kag nagapangayo sila sang bulig halin sa mga opisyal sang Iloilo City Government agud mahatagan sang lihok ang nasambit nila nga problema.
