Nag-ibwal ang hublag-protesta sa Syria matapos ang pagtimbuok sang presyo sang produktong petrolyo.
Ginbalabagan sang mga nagprotesta ang isa ka mayor nga dalan sa sulod sang pila ka oras, samtang may mga protesta man nga ginsuguran sa Hama, Khan Sheikhoun kag Maarat al-Numan.
Base pa sa mga na-report nga insidente, may mga manugprotesta man nga nagsunog sang mga rueda sang salakyan kag nagpagutok sang trapiko.
Ginpatuman sang gobyerno sang pungsod sang Domingo ang pagpasaka sang presyo sang diesel tubtob 40 porsyento kag petrol sang tubtub sa 28 porsyento.
Suno sa gobyerno, temporaryo ang pagtaas sang presyo bangud sa daku nga pagsaka sang global cost sang pagkuha kag pag-import sang fuel.
Ginpahayag man sini nga isa sa mga rason ang overhaul sang Baniyas refinery nga ginapaabot nga makapataas sang kapasidad sini halin sa 80,000 tubtob 130,000 barrels sang langis kada adlaw.
Sa subong, naga-produce ang Syria sang mga 102,000 ka barrels sang fuel kada adlaw, apang nagakinahanglan ini sang yara sa 325,000 ka barrels para sa domestic consumption, gani nagasalig ini sa imports para matabunan ang kakulangan.
Suno naman sa Ministry of Energy, padayon nila nga repasuhon ang presyo sang fuel base sa sitwasyon sang global market kag palaparon sa malawig nga tion ang refining kag storage capacity sang pungsod.
Nahibaluan nga importante ang suplay sang fuel sa pagbangon sang ekonomiya sang Syria samtang padayon ang pagbangon sang pungsod matapos ang 14 ka tuig nga giyera.
