Ginpunto sang isa ka political analyst nga dapat mangin patas, nakabase sa kamatuoran kag ebidensya, kag nagasunod sa husto nga proseso ang impeachment trial batok kay Vice President Sara Duterte.
Sa interview sang Bombo Radyo kay Prof. Ranjit Rye, University of the Philippines-Diliman-Department of Political Science, iya ginpahayag nga dapat unahon sang mga senador ang interes sang publiko kag magpabilin nga impartial ukon wala sang ginapaboran sa trial.
Suno pa sa iya, importante gid naimbitaran ang amici curiae ukon ang friends of the court nga amo ang mga retirerado nga mahistrado nga naghatag sang kasanagan sa mga pamangkot nga kinahanglan sang Senado agud magpadayon ang mga ini nga may ara sang basehan sa isyu sang conviction threshold.
Pahayag pa ni Rye, apisar kinahanglan ang interpretasyon sang Konstitusyon base sa sitwasyon nga nagakatabo sa subong, ginplastar na sang mga mahistrado nga ang Senate Impeachment Court sa gihapon ang may katungdanan nga magdesisyon sa sini nga isyu.
Ini bangud suno sa Konstitusyon, ang Senado lamang ang may gahum sa trial kag pagdesisyon sa mga impeachment case.
Dako suno sa iya ang katungdanan sang senado agud makuha ang hustisya nga ginapangabay sang madamo nga Pilipino.
Gane, kun ano ka importante ang proseso suno kay Rye, amo man sina ka importante ang mangin desisyon sang senado sa impeachment trial sang bise presidente.
