Nanindugan ang Medicus Medical Center nga gin-amoma sang mga ini ang delivery rider nga nadisgrasya sagwa sang ila nga ospital sang nagligad nga Agosto 27.
Sa interview sang Bombo Radyo kay Councilor Alan Zaldivar, Chairman sang Committee on health sang City Council, iya ginpahayag nga base sa confidential incident report nga ginpasa sang ospital sa iya nga opisina, nahatag sang ospital ang emergency intervention sa nasambit nga biktima.
Apang, ginklaro ni Zaldivar nga kinahanglan sa gihapon sang dugang nga pagka-ayo sa mga protocols bangud may ara sang ”gray areas” kun koordinasyon ang pagahambalan sa tunga sang mga ospital kag mga responders.
Suno pa sa iya nga paagi sa consultative meeting nga patigayunon sang Iloilo City Government sa Setyembre 22, ila pagatalakayon kaupod sa Department of Health, Iloilo City Emergency Responders kag iban pa nga mga ahensya ang mga tikang nga dapat ipatuman sa mga kaangay nga insidente.
Importante suno kay Zaldivar nga ma-address ang kaangay nga problema agud indi na maliwat pa ang kaangay nga insidente sang Agusto 27 kun sa diin ginbawian gid sang kabuhi ang biktima.
Tinutuyo man sang amo nga meeting suno sa konsehal nga mapabaskog pa ang koordinasyon sa tunga sang mga responders, mga ospital kag sa mga natungdan nga awtoridad.
