Ginpaidalom sa lockdown ang Malacañang complex subong nga Setyembre 21 kadungan sang ika-54 nga anibersaryo sang deklarasyon sang Martial Law.
Ini bangud sa ginapaabot nga madamo nga mga hublag-protesta ang patigayunon subong nga adlaw.
Suno sa Presidential Communications Office, siraduhon ang New Executive Building kag suspendihon man ang operasyon sang Presidential Action Center bilang kabahin sang security protocols kag para man sa seguridad sang publiko.
Gin-restrict man ang access sa mga dalan kag gate nga pasulod sa Malacañang Palace.
Nahibaluan nga gin-suspend man ang face-to-face classes sa tanan nga lebel sa Manila, kasunod sang rekomendasyon sang kapulisan.
Ginapaabot nga magatipon ang linibo nga mga nagaprotesta sa Liwasang Bonifacio kag magamartsa pakadto sa Mendiola.
Suno sa grupo nga Bayan, kabahin sa ila mga ginapanawagan ang accountability sa flood control scam kag iban pa nga isyu sang korapsyon, political dynasties, mataas nga presyo sang mga balaklon, kag iban pa nga problema sang pungsod.
Ginalauman naman ang masobra 17, 000 ka mga pulis ang iga-deploy sa bug-os nga pungsod para magpatuman sang seguridad sa mga rally, lakip ang 8,500 sa National Capital Region.
Nagpanawagan naman ang Malacañang sa mga organizer kag mga partisipante nga magpabilin nga malinong sa ila nga protesta kag ginpahayag nga bukas si Presidente Ferdinand Marcos Jr. sa pagpamati sang ila mga reklamo.
Septyembre 21, 1972 sang gindeklarar ni Marcos Sr. ang Martial law paagi sa Proclamation 1081 nga amo ang nagmarka sang madulom nga bahin sang maragtas sang Pilipinas nga napun-an sang kalakasan, pagpamigos, pag-antos, kag kamatayon sang madamo nga mga Pilipino.
