Ipatawag bilang testigo si Davao City Mayor Sebastian “Baste” Duterte sa impeachment trial ni Vice President Sara Duterte.
Indi bangud utod siya sang bise presidente apang bangud sa iya posisyon bilang alkalde.
Ginmanduan si Baste nga magdala sang mga rekord sang transaksyon sang Davao City government kag Gencorp Industries Inc. halin 2020 tubtob sa subong.
Lakip man sa mga rekord nga ginapangayo sa iya amo ang mga transaksyon sa mga kompanya nga nagapanag-iya sang mga establisemento sang Jollibee.
Suno sa prosecution, importante ini nga mga rekord agud mabusisi ang mga transaksyon nga may kaangtanan sa mga kompanya nga gindeklara ni VP Sara nga may ara sang financial interest sa iya nga statement of assets, liabilities, and net worth ukon SALN.
