Pagtimalos ang isa sa ginatudlo rason kun ngaa ginluthang-patay ang isa ka lalaki sa namatyan sa Sitio Punong, Barangay Dulonan, Arevalo gab-i sang Setyembre 20.
Ginkilala ang biktima kay alyas “Opok,” samtang ang suspek naman amo si alyas “Lad” lunsay residente sang Barangay.
Sa interview sang Bombo Radyo kay Kagawad Donnie Denila, iya ginpahayag nga may personal nga hiligut-anon ang suspek sa biktima.
Suno pa sa kagawad nga napatay ang utod sang suspek sang nagligad nga bulan sang Mayo matapos ginpatay sang hinablos ni alyas “Opok.”
Gindugang pa sang kagawad nga pag-abot pa lang sang suspek sa namatyan, may pusil na ini nga ginatago kag gintiro sini ang biktima sang duha ka beses.
Sa karon padayon pa nga gina-ayam sang kapulisan ang suspek.
Nagapanawagan naman si Denila sa mga pumuluyo sang ila barangay nga sundon ang mga ordinansa nga ginapatuman agud malikawan ang mga kaangay nga insidente.
