Preparado na ang Probinsya sang Iloilo sa tion nga magsugod ang El Niño phenomenon.
Ini ang ginpakigbahin ni Geron Magbanua nga amo ang acting Iloilo Provincial Government head sang Department of Agriculture kun sa diin 2021 pa lang, may ara na sang National adaptation plan ang probinsya.
Sa interview sang Bombo Radyo kay Magbanua, iya ginpahayag nga matawag pa nga normal ang kainitun subong nga tinion kag indi pa ini matawag nga kabahin sang epekto sang El niño.
Ginpakigbahin man niya nga base sa Philippine Atmospheric, Geophysical and Astronomical Services Administration (PAGASA), sa bulan pa sang Oktubre posible maeksperyensyahan ang init sang nasambit nga phenomenon.
Apang suno sa iya, importante nga preparado man ang mga mangunguma sa dalagan sang panahon ilabi na subong nga makabig bilang “Super El Niño” ang posible nga magaapekto ilabi na sa mga agricultural products.
Dugang pa niya, mas maayo nga likawan lang anay ang pagtanum sang mga produkto nga mabudlay buhiun sa tion sang tag-ilinit, kag magtanum nalang sang mga alternatibo nga mga produkto.
