Nagapanawagan si Iloilo City Councilor Nene Dela Llana kay Iloilo Governor Arthur Defensor Jr. nga indi dapat sini pag-itolerar ang pila ka mga aktibidad ni Iloilo Province Public Information and Community Affairs Office head Nereo Lujan sa iya nga social media.
Suno kay Dela Llana, indi manami nga pamatasan para sa isa ka opisyal nga naga-serbisyo sa gobyerno ang pag-atake sa pila ka personalidad kag opisyal.
Ginpunto sang konsehal nga may freedom of expression ang isa ka tawo, apang kinahanglan gihapon nga may ara sang ‘caution’ sa pag-post sa social media sini bilang ang isa ka public official.
Isa sa ginkwestyon ni Dela Llana ang mga post ni Lujan batok sa Iloilo City Government, lakip ang pagpamuyayaw kay Mayor Raisa Treñas, kag ang video sang pagsaot nanday Dela Llana, Councilor Rex Marcus Sarabia kag Councilor Miguel Treñas nga ginbutangan sang AI-generated nga background music.
Ginkwestyon man ni Dela Llana ang pag-post ni Lujan sa tion sang office hours, nga suno sa iya, wala sang kaangtanan sa opisyal nga katungdanan sini bilang public information officer.
Ginpahayag ni Dela Llana nga bisan personal nga Facebook account ni Lujan ang ginagamit, nagapabilin ini nga public officer kag dapat magpakita sang professionalism kag neutrality.
Ginpahayag pa niya nga wala man siya nagakontra sa tinutuyo ni Lujan nga magpahayag sang iya opinyon, apang ginkwestyon niya ang manner sang pagpahayag kag pag-atake sa mga opisyal sang City Government.
Suno kay Dela Llana, pwede nga i-criticize ang isa ka tawo ukon gobyerno kung ang ginapatuhuyan amo ang natuhoy sa polisa, proyekto ukon akto apang indi na kinahanglan nga maglapaw sa personal nga pag-atake.
Gin-emphasize man sang konsehal nga dapat indi pag-updon ang personal nga isyu sa responsibilidad bilang public official kag indi dapat madalahig ang iban sa personal nga indi pag-intindihanay.
Sa gihapon, ginpahayag ni Dela Llana nga may respeto siya kay Lujan kag naintindihan niya ang posible nga ginhalinan sang mga ginapahayag sini, apang kinahanglan gihapon nga mahibaluan ang limitasyon sang isa ka nagaserbisyo sa gobyerno.
Gani, nagapangabay siya sa gobernador nga magpakig-istorya kag maghatag sang nagakaigo nga atensyon sa isyu agud malikawan ang mga post nga mahimo makahatag sang negatibo nga imahe sa Provincial Capitol.
By: Bombo Cyrene Nasis
