Ginpahayag sang Institute of Contemporary Economics (ICE) nga kulang sang kapin 150 megawatts ang available nga power supply sa Panay Island ikumpara sa ginabulubanta nga demand sang kuryente sa isla.
Sa interview sang Bombo Radyo kay Mr. Bonnie Ladrido, Executive Director sang ICE, iya ginpahayag nga yara lamang sa 430 tubtob 450 megawatts ang available nga on-island power supply sa Panay matapos magnubo ang gina-design nga 580 megawatts bangud sa mga planta nga indi available.
Suno kay Ladrido, halin sa 418 megawatts nga power demand sang nagligad nga duha ka tuig, ginabulubanta nga naglab-ot na ini sa subong sa masobra 600 megawatts bangud sa padayon nga pagdaku sang kinahanglanon sa kuryente.
Bangud sini, kinahanglan magsalig ang Panay sa power supply nga ginakuha halin sa iban nga isla paagi sa Visayas Grid kag Mindanao-Visayas interconnection.
Apang, ginpahayag ni Ladrido, indi man masaligan sang bug-os ang amo nga imported supply bangud may mga power plants man sa iban nga bahin sang Visayas kag Mindanao nga indi available.
Pagpaathag niya, amo ini ang nagadugang sa pressure sa power supply kag nagaresulta sa pagpatuman sang mga yellow alert, red alert kag manual load dropping, nga nagadala sang power interruptions sa mga consumers.
Dugang pa ni Ladrido, indi lamang temporaryo ang problema sa power supply bangud pila na ka tuig nga wala sang daku nga dugang sa baseload capacity sa Panay, samtang nagapadayon nga nagataas ang demand sang kuryente.
