Nagpanawagan ang Department of Education Schools Division of Iloilo City sang mas hugot nga pag-monitor kag pagbuligay sang komunidad, ginikanan kag barangay officials agud matapna ang pagpanigarilyo sang mga kabataan.
Ini matapos nagtaas ang numero sang mga estudyante kag menor de edad nga nadakpan nga naga-lapas sa Anti-Smoking Ordinance sang Iloilo City.
Sa interview sang Bombo Radyo kay Atty. Russel Tabang, spokesperson sang Schools Division of Iloilo City, iya ginpahayag nga kinahanglan protektahan ang mga estudyante batok sa halit nga dala sang sigarilyo kag vape.
Ginpahayag pa ni Tabang nga wala mismo nagasugod sa eskwelahan ang pagkabuyo sang mga estudyante sa pagpanigarilyo, apang sa komunidad mismo, gane importante nga matutukan ini agud indi dalayon nga maguba ang ikaayong lawas sang mga estudyante.
Dugang pa ni Tabang nga dako ang papel sang Barangay Council for the Protection of Children ukon BCPC sa intervention, ilabi na kun aktibo ini sa komunidad.
Nagapangabay naman ini sa publiko nga magbulig sa pagprotektar sa mga estudyante kag magsunod sa mga polisa batok sa sigarilyo kag vape.
