Gin-athag sang National Grid Corporation of the Philippines ukon NGCP nga ang supply deficiency sa Visayas Grid bangod sa mga power plant nga naga-untat sang operasyon nga wala ginapaabot.
Sa interview sang Bombo Radyo kay Atty. Cynthia Alabanza, spokesperson sang NGCP, iya ginpahayag nga indi dapat magresulta sa alert status ang regular nga maintenance sang mga planta bangod ginaplano ini agud malikawan ang kakulang sang suplay.
Apang may mga planta nga nagapatigayon sang unplanned shutdown, indi makahatag sang full capacity, ukon nagalawig ang maintenance labaw sa ginschedule.
Bangod sini, naganubo ang available reserve kag naga-resulta sa manual load dropping ukon power interruption.
Gindugang sang NGCP nga amo ini ang isa sa mga rason sang paglawig sang yellow kag red alert status sa Visayas Grid.
Ginpahayag man niya nga sa kada media release sang NGCP nahanungod sa alert status, ginapakita nila ang mga factors nga nakaapekto sa sitwasyon, lakip ang listahan sang mga power plant nga nagpatigayon sang unplanned shutdown.
By: Bombo Ireca Faye Pioquinto
