Naapresyar sang pila ka mga punong barangay sa syudad sang Iloilo ang pag-postpone sang Barangay and Sangguniang Kabataan Elections (BSKE) 2026.
Para kay Punong Barangay Lloyd Abadiano sang Barangay Zamora-Melliza, City Proper, daku nga bagay ang pagpaiway sang eleksyon bangud makaserbisyo sila sang mas malawig sa ila pumuluyo.
Suno sa iya, may mga programa sila kag proyekto nga sarang matapos sa bag-o nga term setting.
“Daku ini nga bagay kay may mga programs kag projects kami nga indi lang sa isa or duha or tatlo ka tuig. Sa sini nga term setting, siguro ang mga plano namon, basi matapos na,” suno sa opisyal.
Nagpasalig naman si Punong Barangay Shiela Doza sang Barangay Ortiz, City Proper nga padayon ang iya tampad nga serbisyo sa mga pumuluyo sa ila lugar.
“Since wala sang eleksyon, magapadayon kita sang aton nga mga proyekto [kag] programa para sa aton nga pumuluyo, kag magserbisyo sang tampad,” pahayag sini.
Suno pa kay Doza, may nakit-an man siya nga bentaha kag disbentaha sa bag-o nga layi ilabi na sa aspeto kun ma-upod pa sini ukon indi ang iya kaupod nga mga opisyal subong.
Nahibaluan nga sa Republic Act No. 12326, gin-set ang term of office sang tanan nga elected barangay and SK officials sa lima ka tuig.
Wala sang bisan sin-o nga elective barangay official nga makaserbisyo sang sobra sa duha ka sunod-sunod nga termino sa pareho nga posisyon, kag wala man sang elective nga SK official nga makaserbisyo sang sobra sa isa ka termino sa pareho nga posisyon.
