Nabaton na sang Iloilo City Government ang P55-million nga pondo halin sa Philippine Amusement and Gaming Corporation ukon PAGCOR nga igalokar para sa dugang nga classrooms kag public schools sa syudad.
Sa interview sang Bombo Radyo kay Joy Fantilaga-Gorzal, spokesperson ni Mayor Raisa Treñas, iya ginpahayag nga dako nga bulig ang nasambit nga kantidad para sa pagpatukod sang dugang nga mga classrooms para sa pagtuon sang mga kabataan.
Suno kay Gorzal, kada tuig nagakadugangan ang mga estudyante nga naga-eskwela sa syudad kag importante nga mapun-an ang mga kakulangan sang classroom.
Apisar suno sa iya nga may ara sang kwarta ang syudad, ginakabig nila nga dako nga bulig ang mga partnership nga nagahatag sang bulig sa syudad kag gina-welcome gid nila ang tanan nga investors.
Pahayag pa sini nga madamo nga investors, madamo man nga classroom ang matukod.
Dako ang ila pagpasalamat sa mga partners nga handa magbulig ilabi na kay PAGCOR Chairman and CEO, Alejandro H. Tengco, DepEd Secretary, Sonny Angara, kag sa tanan nga nangin kabahin sang proyekto.
