Ginkalipay gid ni Western Visayas Transport Cooperative Chairman Raymundo ‘Boyet’ Parcon ang ginpatuman na nga fare hike subong nga adlaw.
Sa interview sang Bombo Radyo kay Parcon, iya ginpahayag nga madugay na nga ginapaabot sang transport sector ang pagpasaka sang pamasahe ilabi na subong nga nagapabilin nga mataas ang presyo sang produktong petrolyo.
Suno sa iya, madamo na sila sang nangin lihok kaangay sang pagpadala sang petisyon sa Kamara kag Department of Transportation agud masapakan ang ila panawagan, apang subong lang ini napatuman.
Kasunod ini sang aprubado na nga rekomendasyon sang Land Transportation Franchising and Regulatory Board sa Department of Transportation sang nagligad nga Setyembre 25.
Ginklaro man ni Parcon nga ipatuman sa gihapon nga epektibo ang 20% discount para sa mga Senior Citizens, Nagabusong, estudyante kag PWDs.
