Ginpangabay sang isa ka local scientist sa mga Local Government Unit (LGU) nga maghatag sang pondo kag magpatuman sang padayon nga monitoring kag data gathering agud mas husto ang pagplano sang mga tikang batok sa epekto sang climate change, ilabi na sa naga-init nga kadagatan ukon marine heatwave.
Sa interview sang Bombo Radyo kay Dr. Charina Lyn Repollo, Marine Heatwave Tracker Co-developer sang University of the Philippines Marine Science Institute (UP MSI), iya ginpahayag nga lain-lain ang response sang kada lugar sa Pilipinas sa ocean warming rason nga kinahanglan nga ‘site-specific’ man ang mga pamaagi sang LGU sa pagpanghanda kag pagpalig-on sang resiliency sang ila coastal communities.
Suno kay Repollo, lakip sa pinakadaku nga epekto sang ocean warming ang fisheries bangud naganubo ang concentration sang plankton, nga amo ang base sang marine food web.
Pagpaathag niya, kun maapektuhan ang plankton, posible man nga maapektuhan ang mga isda, amo man pangabuhian sang mga komunidad nga nagasalig sa pagpangisda.
Pahayag pa ni Repollo, daku man ang epekto sang pag-init sang kadagatan sa mga sessile organisms ukon mga organismo nga indi makahalin sa ila ginatiniran, pareho sang coral reefs, oysters kag green mussels.
Pahayag pa ni Repollo, gina-research subong ang mga klase sang coral reefs ukon species nga mas makasarang magtiner kag mag-thrive bisan nagainit ang kadagatan, agud ini ang magamit sa conservation kag rehabilitation efforts.
Dugang gin-emphasize niya nga importante ang ‘political will’ sang mga LGU sa paghatag sang igo nga pondo kag suporta para mapadayon ang monitoring system sang mga siyudad kag munisipalidad.
