Nadugangan sang apat ka medalya ang Pilipinas sa nagapadayon nga 2026 Asian Games sa Japan.
Kagab-i, nadepensahan sang two-time Olympian nga si Ernest John “EJ” Obiena ang iya gold medal sa men’s pole vault.
Naka-set man si Obiena sang bag-o nga rekord sa Asiad matapos nga na-clear sini ang 5.91 meters nga amo ang nag-guba sang Asian Games record nga 5.90-meters nga siya man ang naga-uyat sang Hangzhou 2022.
Nagpatas man ini sa 5.91-meters nga amo ang iya season best.
Ini ang ikatatlo nga gold medal sang Pilipinas sa Asian Games matapos ang duha nga nakuha ni Carlos Yulo sa Artistic Gymnastics.
Magluwas kay Obiena, nakuha man ni Victoria Bossong ang bronze medal sa women’s 800m matapos ang time nga 2:05.34.
Ini ang debut sang 23-anyos nga Filipino-American runner sa Asiad.
Bronze medalist man ang 21-anyos nga surfer nga si Jayuard Alciso sa men’s shortboard event matapos ginlutos ang kaangay nga Filipino nga si Toby Espejon sa bronze medal match sa Long Beach sa Tahara, Aichi.
Nagkadto man sa Pilipinas ang silver medal sa sepak takraw matapos nga nalutos sa women’s doubles final batok sa Vietnam, 8-15, 4-15.
Apisar nga ginkabos sa gold, nakahimo sang maragtas ang Philippine trio nanday Abegail Sinogbuhan, Jean Marie Sucalit, kag substitute nga si Nelly Jay Saro paagi sa amo nga best-ever finish sa sepak takraw sa Asian Games. Antes sa finals, may impresibo nga 2-1 record sa Group B ang team kun sa diin ginlutos nila ang Japan kag India.
