Pagahatagan sang group insurance coverage sang Iloilo City Government ang mga accredited disaster volunteers nga nagahatag sang ila serbisyo sa syudad sa tion sang emerhensya ukon kalamidad.
Kabahin ini sa mga gin-istoryahan sa 3rd Quarter meeting sang Iloilo City Disaster Risk Reduction and Management Council (CDRRMC) kun sa diin gindiskusyunan man ang pag-institutionalize sang Barangay Empowerment for Rescue Initiatives, Safety and Emergencies Program kag amo man ang KABALAKA expo.
Suno kay Joy Fantilaga-Gorzal, spokesperson ni Mayor Raisa Treñas, iya ginpahayag nga nagapadayun pa ang pagfinalize sang siudad sa mga guidelines kag qualifications agud mas mangin klaro para sa mga indibidwal nga maka-avail sang nasambit nga insurance.
Tinutuyo sini nga mahatagan sang proteksyon ang mga volunteers sa tion sang emerhensya.
Nahibaluan nga accredited na ang walo ka volunteer groups nga gindugang sang CDRRMO.
Ang nasambit nga accreditation ang kabahin sang Kabalaka Volunteer program nga nagahatag sang lugar sa mga Ilonggo nga luyag magbulig pinaagi sa ila ihibalo sa disaster preparedness and response.
