Ginkanselar sang Senate Impeachment Court ang trial sa kaso ni Vice President Sara Duterte subong nga adlaw, Septyembre 30.
Sandig sa anunsyo sang impeachment court, maga-balik ang trial sa Huwebes, Oktubre 1, 10:00 sa aga tubtob alas-6:30 sang gab-i, kag magapadayon ang bug-os-adlaw nga hearing tubtob Oktubre 15, suno sa ginplano nga schedule.
Ginkumpirmar man ini ni Impeachment Clerk of Court kag Senate Secretary Renato Bantug Jr., kag Senate Majority Floor Leader Juan Miguel Zubiri.
Suno kay Impeachment Court spokesperson Atty. Reginald Tongol, isa ini ka “deliberate strategic procedural pause” kag wala ini nagakahulugan sang pagpauntat ukon pagpalawig sang proseso.
Pahayag ni Tongol, ginhatagan sang pahuway ang duha ka kampo agud mapreparar sa pagbaton kag pag-usisa sang madamo kag teknikal nga financial records halin sa Anti-Money Laundering Council ukon AMLC kag Registers of Deeds.
Ginsiling man sini nga wala nagadugang ang isa ka adlaw nga cancellation sa proseso, bangod suno sa iya, abanse ang impeachment trial sa ila schedule.
Sa nauna nga schedule nga gin-anunsyo sang impeachment court, matabo ang whole-day sessions sa Oct. 1 and 2 kag Oct. 5 to 15.
Pagkatapos, ginapaabot nga magahatag sang ligwa ang proceedings sa deliberasyon sa proposed 2027 national budget kag maga-resume naman ang trial pag-abot sang Nobyembre.
Nahibaluan nga yara na subong ang Senate Impeachment Court sa hearings sa Article II nga nagatutok sa alegasyon sang unexplained wealth ukon indi mapaathag nga kadakuon sang manggad ni Vice President Duterte.
