Ginpahayag sang Maritime Industry Authority ukon MARINA Region 6 nga nagsaka ang cargo rates sang pila ka RoRo shipping operators kasunod sang padayon nga pagtaas sang presyo sang produktong petrolyo.
Sa interview sang Bombo Radyo kay Atty. Nicole Marie Amuan-Arpa, spokesperson sang MARINA Region 6, iya ginpahayag nga ang pagsaka sang presyo sang gasolina kag diesel amo ang panguna nga rason sang pagtaas man sang shipping rates.
Suno sa iya, regulated ang shipping industry rason nga indi na kinahanglan sang government approval antes ma-implementar sang mga shipping operators ang pagtaas sang ila nga mga rates.
Apang, paathag niya, may gahum ang MARINA nga mag-monitor kag mag-imbestigar kon makita nga sobra ukon indi makatarungan ang pagtaas sang ila mga rates kag kon indi ini ma-justify sang mga operators.
Ginklaro man ni Atty. Arpa, wala sang pagtaas sa karon sa pamasahe sang mga pasahero sa RoRo kag ang pagtaas ang yara lamang sa pila ka klase sang cargo ukon rolling cargo.
Pahayag pa niya, posible man nga magpanubo sang cargo rates ang mga shipping operators kon magnubo naman ang presyo sang fuel.
Dugang pa niya, padayon nga gina-monitor sang MARINA ang shipping rates agud masiguro nga ang bisan ano nga pagtaas sini may yara snag nagaka-igo kag makatarungan nga basehan.
