Naghiwat sang coordination meeting ang Iloilo City Police Office (ICPO), upod ang Commission on Higher Education (CHED) kag Department of Education (DepEd) agud diskusyonan ang mga tikang batok sa paglapta sang illegal drugs, lakip ang marijuana, sa mga eskwelahan sa syudad.
Sa interview sang Bombo Radyo Iloilo kay Police Colonel Wilbert Parilla,Director sang ICPO, iya ginpahayag nga gin-coordinate sang kapulisan ang nasambit nga mga ahensya bangud sa impormasyon nga ila nakuha nahanungod sa presensya sang illegal drugs nga mahimo maglapta paagi sa mga estudyante.
Suno kay PCol. Parilla, isa sa mga gina-propose nga tikang amo ang paghimo sang Memorandum of Agreement (MOA) agud may yara sang klaro nga framework kag unified action plan ang mga nasambit nga ahensya.
Pahayag niya, kabahin sang unified action plan ang capacity-building activities kag workshops para sa student leaders agud mabuligan sila sa pag-disseminate sang impormasyon sa iban pa nga mga estudyante.
Lakip man sa plano ang pag-educate sa mga ginikanan agud mangin aware sila sa mga warning signs nga posible nagakadto ukon na-involve ang ila mga kabataan sa illegal drug activities.
Dugang pa ni PCol. Parilla, magahiwat man ang kapulisan sang cyber patrolling agud ma-monitor ang mga illegal nga aktibidad online.
