Ginpanginwala ni Senate impeachment court spokesperson Atty. Regie Tongol ang alegasyon ni former Senator Antonio Trillanes IV nga indi sya ‘welcome’ sa korte matapos nga wala sya gindagdagan sang subpoena ni Presiding Officer Chiz Escudero agud nga mangin testigo.
Suno kay Tongol, wala makahatag sang subpoena si Escudero kay Trillanes, bangud lamang sa rason nga isa na lamang ka adlaw sang nag-manifest ang prosekusyon nga kabahin sa ila nga mangin testigo ang anay senador.
Pahayag pa niya, wala gid sang sala ang korte bangud dapat nga Setyembre 28 pa lang sang naghatag na sang impormasyon ang prosekusyon nga kabahin si Trillanes sang ila witness list, apang ang natabo, isa na lang gid ka adlaw ang nabilin antes nila ginpahibalo nga ipresentar si Trillanes sa korte.
Sang Huwebes, ginkumpirma sang anay senador nga pormal sya nga naghingyo kay Lead House Prosecutor Rep. Gerville Luistro nga maga-withdraw sya bilang testigo kag nagpatigayon na lamang sang iya press conference agud isapubliko ang alegasyon sini sa bise presidente kag sa pamilya Duterte.
Nahibaluan nga kabahin man sa nangin pahayag ni Trillanes nga mas maayo gid kun si Senate President Win Gatchalian ang nagpungko nga presiding officer sa senate impeachment court, agud ‘layman’ ang mindset sini, ilabi na nga indi man kinahanglanun nga abogado ang magpungko sa nasambit nga proceedings.
